दाङमा गोली लागेर एकको मृत्यु

तुलसीपुर, १४ चैत । दाङमा गोली लागेर एक जनाको मृत्यु भएको छ । घोराही उपमहानगरपालिका–१३ का ५० वर्षीय टेकबहादुर गुरुङको गोली लागेर मृत्यु भएको जिल्ला प्रहरी कार्यालय दाङका प्रमुख एसपी गणेश चन्दले जानकारी दिनुभयो । गुरुङको घटनास्थलमै मृत्यु भएको उहाँले बताउनुभयो । उहाँका अनुसार घटना घोराही उपमहानगरपालिका–१२ को जंगलमा गएराती भएको हो । गुरुङलाई सिकार खेल्न गएका व्यक्तिले गोलि चलाएको हुन सक्ने उहाँले बताउनुभयो । घटनाबारे थप विवरणहरू आउन बाँकी रहेको प्रहरीले जनाएको छ । गोली चलाउने व्यक्तिलाई नियन्त्रणमा लिइसकेको र आज दिउँसो सार्वजनिक गरिने प्रमुख चन्दले जानकारी दिनुभयो ।